125 елден сегіз мыңнан астам өтінім, жасанды интеллект көмегімен түсірілген фильмдер және Гран-при үшін 450 мың доллар. Астанада алғашқы Astana AI Film Festival аяқталды. Түскен өтінімдер саны бойынша ол әлемдегі ең ірі халықаралық AI-кино байқауына айналды.
Фестиваль 1–3 қазан аралығында өтті. Қазақстан алғаш рет Astana AI Film Festival – авторлар фильм жасау барысында жасанды интеллектіні пайдаланатын халықаралық байқауды қабылдады. 8 067 өтінімнің ішінен комиссия финалға 25 жұмысты іріктеді. Жеңімпаздар 3 қазанда өткен марапаттау рәсімінде жарияланды.
Бас жүлде мен 450 мың долларды Латвиядан келген Никола Шестак «The First Honest Day» фильмі үшін иеленді. Оның туындысы адамның іс-әрекеті оны қалай өзгертетіні туралы: жаман қылықтар адамды ұсқынсыз етсе, жақсы істер оны жақсарта түседі.
«Шынымды айтсам, жеңемін деп күтпедім. Мұнда таңғажайып жұмыстар мен түрлі жанрлар өте көп болды. Сондықтан қазылар алқасы неліктен дәл менің фильмімді таңдағаны өзіме де қызық», – деді Гран-при иегері.
Оның айтуынша, режиссурамен шамамен төрт жыл бұрын айналыса бастаған, ал жасанды интеллект көмегімен фильмдерді екі жылдан бері жасап келеді. Автор жүлде қаражатын жаңа картиналарға жұмсамақ.
Екінші орын мен 200 мың доллар Үндістаннан келген Abhik Banerjee-ге «SITARA» фильмі үшін берілді. Үшінші орын мен 100 мың долларды Испаниядан келген Ernest Desumbila «Looking For Perseida» туындысымен иеленді.
Бес арнайы марапаттың бірін қазақстандық автор Мырзахан Жұмахан жеңіп алды. Оның «It Was Just a Joke» комедиясы «Үздік кейіпкер» номинациясында үздік деп танылды.
Оқиғаның ортасында – ит пен оның иесінің ағасы. Қарапайым әзілден басталған жанжал біртіндеп нағыз соғысқа ұласады.
«Мен алдыма қандай да бір күрделі немесе астарлы мағына беруді мақсат етіп қойған жоқпын. Бұл – жай ғана жеңіл оқиға. Белгілі бір деңгейде ол мені де сипаттайды: мен пранк пен көңіл көтеруді жақсы көремін», – деп түсіндірді Жұмахан.
Автор бәсекенің жоғары болғанына байланысты алаңдағанын мойындады: оның пікірінше, әр қатысушы үлкен еңбек атқарды және лайықты қарсылас болды.
Басқа арнайы марапаттарға ие болғандар:
- «Үздік оқиға» – Қытайдан 2xLabs, «The Last Span»;
- «Үздік визуалды тіл» – Италиядан Jacopo Zanetti, «What’s the Job?»;
- «Үздік режиссура» – Италиядан Jacopo Reale, «The Fracture»;
- «Үздік тұжырымдама» – АҚШ-тан Zachary London, «Pomegranate».
Тек технология ғана бағаланған жоқ
Халықаралық қазылар алқасының құрамына ЮНЕСКО-ның бұрынғы бас директоры әрі Францияның экс-мәдениет министрі Одри Азуле, Қытай киноиндустриясының өкілдері Ма Пин мен Ван Хао, кәсіпкер әрі инвестор Баладжи Сринивасан, сондай-ақ BytePlus өкілі Ли Лонг кірді.
Фестивальдің тең құрылтайшысы әрі креативті директоры Айзат Құсайыновтың айтуынша, іріктеу кезінде комиссия ең алдымен авторлық идея мен туындының тұтастығына назар аударған. AI-құралдарын меңгеру бағалаудың құрамдас бөліктерінің бірі ғана болды.
Финалистердің жұмыстары 2 және 3 қазанда MEGA Silk Way-дағы Chaplin кинотеатрының үлкен экранында көрсетілді. Көрсетілімдерден бөлек, бағдарламада жасанды интеллектінің кино мен авторлардың жұмысын қалай өзгертіп жатқаны туралы кездесулер мен пікірталастар өтті.
Екі миллион доллар – марапаттар мен жаңа жобаларға
Фестивальдің жалпы қоры екі миллион долларды құрады. Freedom Holding Corp. жанындағы «Freedom Шапағат» корпоративтік қоры ұсынған бір миллион доллар жеңімпаздарды марапаттауға арналған. Тағы бір миллион доллар перспективалы AI-командаларға инвестиция салуға және Қазақстандағы өндірісті дамытуға бағытталады.
Фестивальдің тең құрылтайшысы әрі AAIFF кеңесінің төрағасы Алмас Жали алғашқы байқау AI-киноға деген халықаралық қызығушылықтың ауқымын көрсетті деп есептейді.
«Біз Астананың әлемнің түкпір-түкпірінен киноиндустрия, технология және креативті индустрия өкілдері бас қосатын алаңдардың біріне айналғанын қалаймыз», – деді ол.
Ұйымдастырушылар келесі қадам ретінде фестивальді дамыту, халықаралық қауымдастықты кеңейту және кино мен жасанды интеллект тоғысында жұмыс істейтін авторларды қолдауды атайды.
