Шымкенттің «Ордабасы» футбол клубының бас бапкері қызметіне 44 жастағы бельгиялық маман Карел Герартс тағайындалды, деп хабарлайды Muztaumedia.kz.   

Бұл туралы клубтың амбассадоры әрі тең иесі Бейбіт Әлібеков әлеуметтік желідегі парақшасында мәлімдеді.

«Карел Герартс — «Ордабасының» жаңа бас бапкері. Ол бұған дейін «Юнион», «Шальке» және «Реймс» клубтарын жаттықтырған», – деп жазды Бейбіт Әлібеков.

Карел Герартс бұған дейін Бельгияның «Юнион» командасын 57 матчта жаттықтырған. Оның жетекшілігімен клуб Еуропа лигасының ширек финалына дейін жетті.

Одан кейін немістің «Шальке» клубын тізгіндеп, командамен 33 кездесу өткізді. Ал маманның соңғы жұмыс орны Францияның «Реймс» клубы болды. Бұл командада 40 матч өткізген Герартс 2026 жылдың мамырында қызметінен кеткен.

Айта кетейік, 2026 жылғы маусымда «Ордабасы» молдовалық маман Андрей Мартиннің жетекшілігімен клуб тарихында алғаш рет «алтын дубль» жасады. Шымкенттік команда Қазақстан чемпионатында жеңіске жетіп, ел кубогының финалында Қызылорданың «Қайсар» клубын 4:1 есебімен жеңді.

Share.
Exit mobile version