Қазақ журналистикасы орны толмас қайғыға душар болды. Ел-жұрт «Хабар аға» атап кеткен телевизия ардагері Тілеуқабыл Мыңжасар 75-ке қараған шағында өмірден озды. Танымал тележурналист, отандық телевизияның ардагері, Қазақстан Журналистер одағының лауреаты Тілеуқабыл Мыңжасарды халық ертең ақтық сапарға шығарып салмақ, деп хабарлайды Muztaumedia.kz ақпараттық агенттігі.
Қаралы хабарды журналист Ринат Кертаев жеткізді.
— Отандық телевизияның ардақты ардагері, ұзақ жылдар бойы «Хабар» агенттігінің Алматы облысындағы меншікті тілшісі болған Тілеуқабыл Мыңжасар ағамыздың дүниеден өткенін естіп, қабырғамыз қайысты, — деп жазды Ринат Кертаев.
Оның айтуынша, Тілеуқабыл Мыңжасар журналистиканы қызмет емес, өмірінің мәні деп түсінген азамат болған. Журналистиканың тарланы, тікелей репортаждың шебері Тілеуқабыл Мыңжасар бар ғұмырын телевизия саласына арнады. 10 мыңнан астам сюжет дайындап, көрерменнің көзайымына айналды. Ол «Хабар» агенттігінде құрылған күннен бастап жұмыс істеді. 1998 жылдан бастап телеарнаның Алматы облысы бойынша меншікті тілшісі қызметін атқарды. Кейінгі жылдары шәкірт тәрбиелеп, талай жастың біліктілігін шыңдады. Оның кәсіби шеберлігі өз алдына, адамгершілігі мен қарапайым болмысы өзгелерден даралап тұратын. Ол «Хабар» агенттігінің дамуына өлшеусіз үлес қосты.
— Тілеуқабыл аға — журналистиканы қызмет емес, өмірінің мәні деп түсінген азамат еді. Өзі бір сұхбатында: «Мен мамандығымды жан-тәніммен жақсы көрдім» деген болатын. Ол үшін үлкен-кіші сюжет болмады: «Мен үшін ТВ сюжеттің үлкен-кішісі жоқ. Әрқайсысының маңызы зор болды», – дейтін. Ал өз кәсіби жолын бір ауыз сөзбен: «40 жылдан астам… Тілші ғана болдым», – деп сипаттаған. Осы «тілші ғана болдым» деген сөздің өзінде үлкен тағдыр жатыр. Ол Алматы облысының ауыл-аймағын аралап, қарапайым халықтың мәселесін республикалық эфирге жеткізді, — деді ол.
Тілеуқабыл Мыңжасар Түркістан қаласында туған. 1975 жылы әл-Фараби атындағы Қазақ ұлттық университетінің журналистика факультетін бітірген.
1975 жылы Қазақ жасөспірімдер телевидениесінде алғашқы хабары эфирге шықты. «Хабар» агенттігінде құрылған күннен бастап жұмыс істеді.
«Еңбекте үздік шыққаны үшін» медалімен, Қазақстан Президентінің Алғыс хатымен марапатталған. Қазақстан журналистер одағының лауреаты, Алматы облысының құрметті азаматы. «Хабар» агенттігінің «Алтын микрофонының» иегері.
Кәсіби шеберлігімен, салмақты сөзімен және журналистикаға деген адалдығымен танылған Тілеуқабыл Мыңжасар отандық телевизияда өзіндік қолтаңбасын қалдырды.