Аршалы кентіндегі түзеу мекемесінде белгілі спортшы әрі блогер Айтым Жақыпов сотталғандармен кездесті. Ашық форматта өткен әңгіме адамның өміріндегі қиындықтарды еңсеру, өз қателігіне жауапкершілікпен қарау және жаңа өмір бастау мүмкіндігіне арналды, деп хабарлайды Muztaumedia.kz ақпарат порталы.
Кездесу барысында спортшы өзінің өмірлік тәжірибесімен бөлісіп, мақсатқа жету жолындағы қиындықтар туралы айтып берді. Оның сөзінше, спортпен тұрақты айналысу, тәртіп пен табандылық адамды ішкі тұрғыдан өзгертіп, алға қойған мақсатына жетуге ықпал етеді.
«Адамның қанша рет құлағаны маңызды емес. Ең бастысы – қайта тұрып, алға қарай жүруге күш табу. Өткенді өзгерте алмайсың, бірақ болашағыңды өзің өзгерте аласың», – деді Айтым Жақыпов.
Кездесудің негізгі мәні – сотталғандарды өз өміріне сын көзбен қарауға, жасаған әрекетінің салдарын түсінуге және алдағы өміріне жауапкершілікпен қарауға ынталандыру.
Бұл бағыт «Заң және тәртіп» қағидатының мазмұнымен де тығыз байланысты. Заңды сақтау – тек белгіленген талаптарды орындау ғана емес, сонымен бірге әр адамның өз әрекеті үшін жауапкершілік алуы. Ал қоғамдық тәртіп пен қауіпсіздікті қамтамасыз етудің маңызды тетіктерінің бірі – құқық бұзушылықтың қайталануына жол бермеу және азаматтарды заңға бағынатын өмір салтына бейімдеу.
Осы тұрғыдан алғанда, сотталғандарды қайта әлеуметтендіру жұмыстарының маңызы зор. Адамның жазасын өтеуімен қатар, оның қоғамға қайта оралуына дайындалуы, еңбек етуге, өз бетінше шешім қабылдауға және заң талаптарын сақтауға ұмтылысы қалыптасуы қажет.
Мұндай кездесулер сотталғандарға өмірде екінші мүмкіндік бар екенін түсіндіруге бағытталған. Спортшының жеке тәжірибесі арқылы тәртіп, еңбек және табандылықтың адамның өмірін өзгертуге қабілетті екені көрсетілді.
Кездесу соңында Айтым Жақыпов сотталғандарды уақытты тиімді пайдалануға, өздерін дамытуға және болашаққа нақты мақсат қоюға шақырды.
Заң – жауапкершіліктің негізі, ал тәртіп – өзгеріске бастайтын күнделікті таңдау. Адамның өткен қателігі оның бүкіл болашағын анықтамауы тиіс. Ең маңыздысы – өз қатесін түсініп, оны қайталамауға шешім қабылдау және жаңа өмірге нақты қадам жасау.