Танымал актер әрі блогер Нұрсұлтан Жақсыген бұрынғы жұбайы Фариза Алмасқызына қатысты іс бойынша сот үкімімен 2 жыл 3 айға бас бостандығынан айырылды, деп хабарлайды Muztaumedia.kz.
Бұл туралы Руслан Өтепбай хабарлады.
Сондай-ақ сот шешімі бойынша актер бұрынғы әйеліне 5 миллион теңге көлемінде өтемақы төлеуі тиіс.
Іс Нұрсұлтан Жақсыгеннің бұрынғы жұбайына қатысты әлеуметтік желіде ар-намысы мен қадір-қасиетіне нұқсан келтіретін ақпарат таратты деген айыппен қаралған. Актер бұған дейін кейбір даулы жазбалардың өзіне қатысы жоқ екенін айтып, оның атынан жалған парақшалар ашылғанын мәлімдеген.
Бұған дейін мемлекеттік айыптаушы Нұрсұлтан Жақсыгенді 3 жылға бас бостандығынан айыруды сұраған еді. Ал сот оған 2 жыл 3 ай мерзімге бас бостандығынан айыру жазасын тағайындады.
Сот процесінің соңғы отырыстары жабық форматта өтті.
Сот үкімі шыққаннан кейін Фариза Алмасқызы халыққа алғысын білдірді. Ол осы уақыт ішінде қолдау көрсеткен жандарға ризашылығын жеткізді.
Үкімнің заңды күшіне енген-енбегені және тараптардың апелляциялық шағым түсіретіні әзірге нақтыланбаған.