Жол-құрылыс материалдарының сапасын бақылау енді цифрлық технологиялардың көмегімен жүргізіледі. Ұлттық жол активтері сапасының орталығында қолданылатын KazRoadLab жүйесі сынама алынған сәттен бастап зерттеу нәтижесі дайын болғанға дейінгі барлық үдерісті электронды форматта тіркеуге мүмкіндік береді, деп хабарлайды Muztaumedia.kz .
Жол инженері планшет арқылы сынама алынған орынды белгілеп, материал туралы ақпарат пен фотосуреттерді жүйеге енгізеді. Әрбір сынамаға жеке QR-код беріледі. Бұл оның зерттелу тарихын бақылауға мүмкіндік береді.
Жүйенің маңызды ерекшелігі – зертхана қызметкерлері сынаманың қай жолдан алынғанын, мердігер мен тапсырыс берушінің кім екенін білмейді. Бұл зерттеу нәтижелерінің объективті болуына ықпал етеді.
KazRoadLab сынақ жабдықтарынан алынған деректерді автоматты түрде қабылдап, есептеулер жүргізеді және нәтижелерді хаттамаға енгізеді. Ал өлшеу көрсеткіштері камераға түсіріліп, жүйеде сақталады. Бұл қателерді азайтып, қажет болған жағдайда нәтижелерді қайта тексеруге мүмкіндік береді.
Жүйе 2019 жылдан бері қолданылып келеді, ал 2024 жылы жаңа технологиялық платформаға көшірілді.
KazRoadLab – деректердің ашықтығын арттыруға, зертханалық сынақтарды жүйелеуге және жол сапасын бақылауды жетілдіруге бағытталған цифрлық шешім.