Жетісу облысының бюджет ақшасына блогерлерді шақырмақ. Басты себеп, өңірдің туристік әлеуетін бюджеттің қаражаты арқылы жарнамалау, деп жазады Muztaumedia.kz.
2031 жылға дейінгі туризмді дамыту жөніндегі Мастер-жоспарын әзірлеу облыстың туризм саласын дамытудың бірыңғай стратегиялық бағытын қалыптастыру, инфрақұрылымды дамытудың басымдықтарын айқындау, инвестициялық ұсыныстар әзірлеу және мемлекет пен бизнестің өзара іс-қимылын үйлестіру үшін қажет.
— Сонымен қатар блогерлер мен инфлюенсерлерді тарту – өңірдің туристік әлеуетін ілгерілетудің тиімді құралы. Бұл өңірдің танымалдылығын арттыруға, мақсатты аудиторияның қамту аясын кеңейтуге және туристер легін көбейтуге ықпал етеді. Соның нәтижесінде инвестиция тартуға, сондай-ақ шағын және орта бизнестің дамуына оң әсерін тигізеді, -делінген әкімдіктің жауабында.
Жетісу облысы құрылғаннан бері Алакөл жағалауының инфрақұрылымын дамыту бағытында жұмыстар атқарылды. Атап айтқанда, ұзындығы 180 шақырым болатын «Үшарал – Достық» және 313,5 шақырымдық «Талдықорған – Үшарал» автожолдары қайта жаңғыртылды. Электр энергиясының тапшылығы мәселесі шешіліп, мобильді байланыс пен талшықты-оптикалық интернет желісі тартылды. Сондай-ақ 69,7 шақырым кәріз желісі салынды, ал жыл соңына дейін тазарту құрылыстарын аяқтау жоспарланып отыр. Бұдан бөлек, 2027 жылдың соңына дейін ұзындығы шамамен 14 шақырым болатын жағалауды бекіту бөгетінің құрылысын аяқтап, кейіннен аумақты абаттандыру жұмыстары жүргізіледі.
— Қабылданған шаралар бүгінде өз нәтижесін беруде: көрсетілген ақылы қызметтердің көлемі 7,3 млрд теңгеден 8,4 млрд теңгеге дейін ұлғайды, салық түсімдері 3,6 млрд теңгеден 4,1 млрд теңгеге жетті. Сонымен қатар 1 500-ден астам жаңа жұмыс орны ашылды. Жоспарланған барлық жобалар толық іске асырылғаннан кейін Алакөл жағалауына келетін туристер саны жылына 2 миллион адамнан асады деп күтілуде., — делінген Жетісу облысының әкімдігінің берген хабарламасында.