Жетісайдағы тойда түсірілген видео әлеуметтік желілерде тарағаннан кейін полиция қылмыстық іс қозғады. Видеода Түркістан облысының 66 жастағы тұрғынының діни және әлеуметтік алауыздықты қоздыру белгілері бар жария мәлімдеме жасағаны айтылған, деп хабарлайды Muztaumedia.
Қазақстан Ішкі істер министрлігі ресми мәлімдеме жасап, әлеуметтік желілерді мониторингілеу барысында полиция қызметкерлері Түркістан облысының 66 жастағы тұрғынының жария сөздері жазылған бейнежазбаны анықтағанын хабарлады.
«Аталған факті бойынша полиция қылмыстық іс қозғады», – делінген ІІМ хабарламасында.
Ведомство Қазақстан Конституциясы әрбір азаматқа жынысына, тегіне, әлеуметтік жағдайына, дінге көзқарасына және өзге де мән-жайларға қарамастан тең құқық пен бостандыққа кепілдік беретінін еске салды.
«Адамның ар-намысын қорлауға, діни, әлеуметтік немесе өзге де белгілері бойынша кемсітуге бағытталған кез келген жария үндеулер, сондай-ақ қоғамдық келісім мен бірлікке нұқсан келтіруі мүмкін әрекеттерге жол берілмейді. ІІМ сөз бостандығы жауапкершіліктен босатпайтынын атап өтеді. Заң талаптарын бұзу белгілері бар кез келген жария мәлімдемеге құқықтық тұрғыдан қағидатты баға беріледі», – деп мәлімдеді министрлік.
Еске салайық, бұған дейін әлеуметтік желілерде Жетісайдағы тойда түсірілген видео кеңінен тараған болатын. Онда қалыңдықтың туысы музыкаға, өнер адамдарына және ерлер мен әйелдердің тойда бірге отыруына қатысты жағымсыз пікір білдірген.
«Біріншіден, музыкадан арылу керек. Екіншіден, ерлер мен әйелдер бөлек отыруы тиіс. Әншілер маған ренжімесін. Егер тойлар өнерпаздарсыз өтсе, олар жұлдыз болудан қалып, танымалдылығынан айырылады. Шариғатта оларды «шайтанның жаршылары» деп атайды», – деген ол.
Бұл сөздер әлеуметтік желі қолданушылары арасында қызу талқыланды.