Танымал журналист Динара Сәтжан қуанышты жаңалығымен бөлісті, деп хабарлайды Muztaumedia.kz ақпарат порталы.
Ол бүгін келінін үйге алып келеді. Алайда ене болатынын ойлаған сайын қобалжып жүргенін де жасырмады.
«Бүгін келінімізді үйге алып келеміз!
Білесіздер ме, бұл – үлкен жауапкершілік. Қазіргі заманғы ене ретінде зумерлердің жеке шекарасына өте ұқыпты қарайтынын түсінемін. Оларды да жақсы түсінемін. Ал біз, миллениалдар, «сабыр түбі – сары алтын», «еңбек етсең ерінбей, тояды қарның тіленбей» деген түсініктермен өстік. Z буынынан кейінгі Альфа ұрпағымен қарым-қатынасымыз қандай болатынын елестетудің өзі қызық. Енеге дипломатия бойынша арнайы курс оқуға тура келетін шығар.
Әзілді былай қойғанда, ұрпақ та, заман да өзгергенімен, бір нәрсе өзгермейді.
Әр ата-ана үшін ең бастысы – баласының бақытты болғанын көру. Мінсіз болғанын емес. Ыңғайлы болғанын емес. Ең бастысы – бақытты, сүйікті әрі өзіне сенімді болғанын қалау.
Егер балаларымыздың бақыты үшін бізге жаңа нәрсені үйрену, өзімізді өзгерту, олардың жеке шекарасын құрметтеу, еркіндік беру және кейде жай ғана жанында болу қажет болса, мен ол үшін бәрін жасауға дайынмын. Ал бүгін – жай ғана бақытты күн. Бүгін біз өз қызымызды үйге алып келеміз», — деп жазды ол.