Алматыда «ҚазТрансГаз» АҚ бас директорының бұрынғы кеңесшісі Санжар Бокаевқа қатысты қылмыстық іс бойынша сот процесі өтіп жатыр. Прокурор айыптау актісін оқып, алаяқтық жасау, қылмыстық жолмен алынған кірістерді заңдастыру, гранит тақталарды ұрлауды ұйымдастыру, ағаштарды заңсыз кесу және жалған ақпаратты қасақана тарату әрекеттерінің мән-жайын егжей-тегжей баяндады, деп хабарлайды Muztaumedia.kz .
Прокурордың айтуынша, гранит тақталарды ұрлау оқиғасын қолдан сәтті ұйымдастырған соң Боқаев қылмыстық әрекеттер арқылы қоғамда жалған дау-дамай туғызуды жалғастыруды көздепті.
2025 жылдың күзінде ол Баум тоғайын абаттандыру жұмыстарын жүргізіп жатқан «Базис-А» құрылыс компаниясы мен мемлекеттік органдарға қарсы ақпараттық шабуыл ұйымдастыруды жоспарлады. 26 қазанға Түрксіб ауданының тұрғындарымен кездесу белгіленгендіктен, Боқаев осы шара қарсаңында қоғамда үлкен дау туғызуды көздеді. Ол алдымен тоғайдағы ағаштарды жасырын кесіп, кейін олардың орнына коммерциялық жылжымайтын мүлік салу мақсатында жасыл желек заңсыз әрі аяусыз жойылып жатыр деп жұртшылықты дүрліктіруді ойластырды.
Осы мақсатта Боқаев пен оның жеке мобилографы Ұ.Нүсіпқожа бұған дейін гранит тақталарды ұрлауға көмектескен А.Хамрақұловқа қайта жүгінген. Тапсырыс берушілерден ақша алған Хамрақұлов қаладағы ломбардтардың бірінен кәдімгі бензинмен жұмыс істейтін ара сатып алған.
2025 жылғы 24 қазан күні кешкі уақытта Хамрақұлов жалдаған адамдар Баум тоғайына жасырын кіреді. Олар екі жарым сағат ішінде үйеңкі, қараған және қарағашты қоса алғанда, 16 ағашты әдейі кесіп, зақымдаған. Сол түні, 25 қазанда, қылмыс жасалғаннан кейін Нүсіпқожа орындаушылармен кездесіп, оларға 100 мың теңге төлеген.
Жоспардың алғашқы бөлігі орындалғанына көз жеткізген ұйымдастырушылар енді оны жұртшылыққа жария етуге кіріседі. Сол түні Боқаев пен Нүсіпқожа шетелдік телефон нөмірінен ағаштардың кесіліп жатқаны туралы жасырын хабарлама алғандай кейіп танытқан. Олар қол шамдарын алып тоғайға барады да, «белгісіз қылмыскерлерді» қуғандай көрініс ұйымдастырып, оны бейнежазбаға түсіреді.
Келесі күні, 26 қазанда, аудан тұрғындарымен кездесу басталар алдында Боқаев қоғам белсенділерін тоғайға ертіп барып, өзінің тапсырмасымен кесілген ағаштарды көрсеткен. Камера алдында ол әлдебір мүдделі тұлғалар тұрғын үй кешендерін салуға жер босату үшін ағаштарды жойып жатыр деп мәлімдеген.
Кейін Боқаев монтаждалған бейнероликті Instagram желісіндегі жеке парақшасында жариялаған. Айыптау тарапының айтуынша, ол өзін қоғам мүддесін қорғаушы ретінде көрсетіп, әлеуметтік желідегі оқырмандарын әдейі жаңылыстырған.
Прокурор бұл әрекеттер арқылы өзін «жарнамалаудың» салдарынан табиғатқа және «Медеу» мемлекеттік табиғи паркіне нақты зиян келтірілгенін атап өтті. Осыған байланысты Боқаев пен Нүсіпқожаға алдын ала сөз байласқан адамдар тобының құрамында ағаштарды заңсыз кесу және жою бойынша айып тағылды.