Алматыда қалалық Ардагерлер кеңесі Президиумының кеңейтілген отырысы өтті, деп хабарлайды Muztaumedia.kz.
Жиынға Президиум мүшелері, аудандық Ардагерлер кеңестерінің төрағалары және қалалық ардагерлер ұйымдарының белсенді өкілдері қатысып, алдағы Құрылтай сайлауына ардагерлердің қатысуын ұйымдастыру мәселесін талқылады.
Алматы қалалық Ардагерлер кеңесінің төрағасы Ақан Бижанов баяндама жасап, күн тәртібіндегі мәселелерге тоқталды. Ол қалалық және аудандық Ардагерлер кеңестерінің алдағы кезеңдегі негізгі міндеттері мен жұмыс бағыттарын айқындады.
«Ардагерлер — қоғамдағы бірлік пен сабақтастықтың, елдік құндылықтар мен өмірлік тәжірибенің алтын көпірі. Олар жас ұрпаққа бағыт-бағдар беріп, қоғамдық келісім мен тұрақтылықты нығайтуға үлес қосып келеді. Сондықтан алдағы Құрылтай сайлауында ардагерлердің азаматтық белсенділігі ерекше маңызға ие. Біз әрбір ардагерді және қала тұрғындарын сайлауға белсенді қатысып, өз таңдауын жасауға шақырамыз. Бұл — еліміздің болашағына деген жауапкершілігімізді көрсететін маңызды қадам», — деді Бижанов.
Жарыссөз барысында аудандық Ардагерлер кеңестерінің төрағалары мен өзге де қатысушылар пікірлерін білдірді.
Күн тәртібіндегі бірінші мәселе бойынша ардагерлер мен тұрғындардың алдағы сайлауға белсенді қатысуын қамтамасыз ету, сондай-ақ түсіндіру жұмыстарын жүргізу мақсатында Алматы қалалық Ардагерлер кеңесінің штабы құрылды.
Отырыс қорытындысында Алматы қалалық және аудандық Ардагерлер кеңестерінің алдағы міндеттері мен жұмыс бағыттарын айқындайтын тиісті шешімдер қабылданды.