Қырғызстанда өтіп жатқан VI Дүниежүзілік көшпенділер ойындарындағы көкпар турнирінде Қазақстан құрамасы екінші жеңісіне қол жеткізді, деп хабарлайды Muztaumedia.kz.
В тобындағы соңғы кездесуінде қазақстандық спортшылар Венгрия құрамасын 9:4 есебімен жеңді. Ұлттық құрама алдын ала кезеңдегі екі кездесуінде де жеңіске жетіп, құрамында Ресей командасы да болған топта бірінші орын алды.
Финалда Қазақстан құрамасы А тобында жеңіске жеткен Қырғызстан командасымен кездеседі. Шешуші матч 6 қыркүйекте Астана уақытымен сағат 13:00-де басталады.
Қазақстан мен Қырғызстан Дүниежүзілік көшпенділер ойындарының финалында қатарынан үшінші рет кездескелі отыр. Бұған дейінгі екі финалда да қазақстандық көкпаршылар жеңіске жетіп, бірінде 4:3, екіншісінде 5:4 есебімен басым түскен.
VI Дүниежүзілік көшпенділер ойындары Қырғызстанда өтіп жатыр және 6 қыркүйекте аяқталады.