Алматыдағы ойын-сауық орындарының бірінде болған жанжалдың мән-жайын құқық қорғау органдары анықтап жатыр. Оқиғаға Алматы облысы прокурорының қатысы болуы мүмкін, деп хабарлайды Azattyq Rýhy-на сілтеме жасаған Muztaumedia.kz.
Оқиға туралы ақпарат 15 қыркүйекте Threads әлеуметтік желісінде жарияланды. Жазба авторының айтуынша, 5 қыркүйекте Еңбекшіқазақ ауданының аға прокуроры ойын-сауық орындарының бірінде жанжал шығарып, полиция қызметкерлерінің заңды талаптарын орындаудан бас тартқан. Сондай-ақ жазбада оның мас күйінде жүрген болуы мүмкін екені айтылған.
Автордың мәліметінше, прокуратура қызметкерін полицияға жеткізіп, уақытша ұстау изоляторына қамаған. Кейін ол босатылғаны жазылған.
Әлеуметтік желіде аудан прокуратурасының басшысы полиция қызметкерлерінің ісіне араласып, қарамағындағы қызметкерге заңда көзделген процессуалдық шараларды қолданбауға көмектесуі мүмкін деген болжам да айтылған. Бұл ақпарат әзірге ресми түрде расталған жоқ.
Алматы қаласы Полиция департаментінің мәліметінше, қаланың ойын-сауық орындарының бірінде жанжал болғаны туралы «102» арнасына хабарлама түскен.
«Оқиғаға қатысушылар Алмалы аудандық полиция басқармасына жеткізілді. Осы факті бойынша тексеру жүргізіліп жатыр. Оның қорытындысы бойынша тиісті шешім қабылданады», – деп хабарлады Алматы қаласы Полиция департаментінің баспасөз қызметі.
Тексеру нәтижесі әзірге жарияланған жоқ.