Мемлекет басшысы Қасым-Жомарт Тоқаев Омбыда Ресей президенті Владимир Путинмен кездесуі кезінде Ресей мен Украина арасындағы соғыс қимылдарын уақытша тоқтатып, «Ыстамбұл 2.0» форматындағы келіссөздерді қайта жандандыру мүмкіндігін қарастыруды ұсынды, деп хабарлайды Muztaumedia.
Қасым-Жомарт Тоқаев қазіргі қақтығыстың табиғаты өзге өңірлік жанжалдардан өзгеше екенін және оны түсіну оңай емес екенін айтты. Оның сөзінше, Әзербайжан мен Армения арасындағы қақтығыстың тарихи себептері айқын болғанымен, Ресей мен Украина арасындағы жағдайдың мәні мүлде басқа және түсініксіз.
«Бұл жерде қандай да бір азаматтық соғыс туралы сөз болып отырған жоқ. Біз әрдайым Украина халқына, оның мәдениеті мен тіліне құрметпен қарадық және бұл қақтығыстың табиғаты көпшілікке, соның ішінде бізге де толық түсінікті емес деп санаймыз. Мәселен, Әзербайжан мен Армения арасындағы, оның ішінде ұзақ уақытқа созылған қақтығыстың мәні мен шығу тегі біз үшін анық еді. Оның тарихи себептері белгілі болатын. Ал бұл жағдайды түсіну өте қиын», – деді Тоқаев.
Сондай-ақ, Қасым-Жомарт Тоқаев қазіргі жағдайда қақтығысты уақытша тоқтатып, «Ыстамбұл формуласы 2.0» деп аталатын келіссөздер форматына қайта оралу мүмкіндігін қарастыру қажет екенін айтты. Оның пікірінше, бұған дейінгі келіссөздер барысында тараптар елеулі ілгерілеуге қол жеткізген.
Қазақстан Президенті сондай-ақ АҚШ-тағы Аляскада өткен келіссөздер кезінде Владимир Путиннің «барынша дипломатиялық икемділік» танытқанын атап өтті.
«Бұл – маған пікірімді сұрағандықтан айтып отырған қарапайым ғана көзқарасым. Бәлкім, бұл қақтығысты қазір тоқтата тұрып, Ыстанбұл формуласы 2.0 нұсқасына қайта оралған жөн шығар. Себебі онда елеулі нәтижелерге қол жеткізілген болатын. Әрине, Ресейді қоса алғанда, ірі державалардың кепілдігімен әрі қарай көптен күткен бейбітшілікке қарай қадам жасау қажет», – деді Тоқаев.
«Жастардың қаза тауып жатқаны өкінішті. Олар – Ресей мен Украина секілді бауырлас халықтардың генофонды. Мұның бәрін тоқтату керек. Өйткені қазір болып жатқан жағдай Ресей мен Украина мемлекетінің қарсыластарының мүддесіне қызмет етіп отыр», – деп түйіндеді Қазақстан Президенті.
Еске салайық, 25 шілдеде Қасым-Жомарт Тоқаев Қазақстан мен Ресейдің өңіраралық ынтымақтастығының XXII форумына қатысу үшін Омбы қаласына барды.
Сапар аясында Қазақстан мен Ресей президенттері екіжақты кездесу өткізіп, ынтымақтастық мәселелерімен қатар халықаралық күн тәртібіндегі өзекті тақырыптарды талқылады.