Белгілі шоумен әрі режиссер Нұртас Адамбай «Замандас» подкастына берген сұхбатында дінге қатысты бұрын айтқан кесімді пікірлері мен қазіргі көзқарасы туралы ашық айтты, деп хабарлайды Muztaumedia.kz.
Өнер иесі бұған дейін адамдарға өз ойын таңып, ақыл айтуға тырысқаны қателік болғанын мойындады. Оның айтуынша, адам өз еркіне қарсы нәрсені қабылдай алмайды, сондықтан ешкімге өзінің көзқарасын күштеп таңуға болмайды.
Желіде тараған «футбол ойнау харам» деген пікіріне қатысты Нұртас Адамбай бұл сөздің өзіне телінгенін айтты.
«Мен «харам» деген сөзді қолданған жоқпын, оны маған теліп жіберді. Биыл өз қателігімді мойындаймын: футболмен айналыспау керек, оны қарамау керек деп айтқаным таза ақымақтық болды», — деді ол.
Режиссер өз әрекеттері арқылы біреуді діннен алыстатып алуы мүмкін екенін ойлайтынын айтып, мұндай жағдайдан іштей қорқатынын жеткізді. Оның пікірінше, адамның сеніміне нұқсан келтіру немесе оны діннен теріс айналдыру — ең ауыр нәрселердің бірі.
Адамбай бұған дейін өмірінде белгілі бір «қараңғылықта» болғанын, ал бүгінде өзі ұстанатын ислам дінінен өз жолын тапқанын айтты.
Сондай-ақ ол кез келген адамды нәсіліне, дініне немесе жынысына қарамастан құрметтеу қажет екенін атап өтті. Режиссердің сөзінше, өзгеге ақыл айтпас бұрын, алдымен адам өз-өзін түзетуі керек.