Әнші Алтынай Жорабаеваның тұңғыш қызының ұзату тойына актер Сәбит Әбдіхалықов пен әнші Айгүл Иманбаеваның ұлы Асылжанның қатыспауы әлеуметтік желіде талқыланды. Оқырмандардың сұрағына жауап берген Асылжан бұл тойға шақырылмағанын айтып, жағдайға түсіністікпен қарайтынын жеткізді, деп хабарлайды Muztaumedia.kz.
Ол Instagram парақшасында былтыр Алтынай Жорабаеваның екінші қызы Айнараның өзінің үйлену тойына арнайы келіп, ақ тілегін білдіргенін еске алды.
«2024 жылы Айнара тойыма келіп, мені құттықтап кетті. Тойымыз Астанада ең жақын 30 шақты туыстың ортасында өтті. Оны Instagram-да жарияламадық. Айнара – өте парасатты, ақылды қыз. Оның қуанышына шын жүректен ортақпын», – деді ол.
Сондай-ақ Асылжан тұңғыш қыздың ұзату тойына шақырту алмағанын жасырмады.
«Тойға шақырту алған жоқпын. Оның себебін толық түсінемін. Ренішім жоқ, ешкімді кінәламаймын. Балаларды бір-біріне жақындататын – қан байланысы емес, үлкендердің өзара қарым-қатынасы», – деп жазды Асылжан.