Алматы қаласының прокуратурасы жол қозғалысы қауіпсіздігін қамтамасыз ету мақсатында өткен тәулік ішінде қала аумағында 1 542 жол ережесін бұзу фактісі анықтаған, деп хабарлайды Muztaumedia.kz.
Кеше Алматы үшін ерекше кештердің бірі болды. Әлемдік деңгейдегі жұлдыз Канье Уэсттің концерті қала тұрғындары мен қонақтарын бір алаңға жинап, мегаполистің түнгі өміріне жаңа серпін берді. Алайда концерттен кейін қала көшелеріндегі жағдай жол қозғалысы қауіпсіздігі мәселесін тағы бір мәрте күн тәртібіне шығарды.
Олардың ішінде 185 құқық бұзушылық жол қозғалысына қатысушылардың өмірі мен денсаулығына жоғары қауіп төндіретін өрескел әрекеттер ретінде тіркелген.
Ең алаңдатарлығы – олардың арасында көлік жүргізушілерінің мас күйінде рөлге отыруы, қарсы бағытқа шығуы және қауіпті маневр жасауы сияқты әрекеттер бар.
Прокуратура мәліметінше, бір тәулікте:
— 8 жүргізуші көлікті масаң күйде басқарған;
— 2 көлік жалған мемлекеттік нөмірмен жүрген;
— 76 жүргізуші маневр жасау қағидаларын бұзған, оның ішінде қауіпті «шашка» жасаған;
— 68 адам қауіпсіздік белдігін тақпаған;
— 7 жүргізуші қарсы қозғалыс жолағына шыққан;
— 24 жүргізуші көлік басқару кезінде ұялы телефон пайдаланған.
Бұдан бөлек, 20 көлік арнайы тұраққа қойылды.
Бұл көрсеткіштер Алматыдағы түнгі қозғалыстың қаншалықты қарқынды екенін көрсетеді. Әсіресе қалада ірі мәдени және ойын-сауық шаралары өткен күндері көлік ағыны бірнеше есе артып, жолдағы қауіпсіздікке түсетін салмақ та күшейеді.
Концерттер, фестивальдер мен басқа да бұқаралық іс-шаралар мегаполиске жаңа тыныс береді. Бірақ көңіл көтеру кеші жолдағы қайғылы жағдайға ұласпауы керек.
Бір түнгі концерт есте қаларлық музыкамен емес, жолдағы қайғылы оқиғамен есте қалмауы тиіс.
Алматының түнгі өмірі қаншалықты қызу болса да, жолдағы басты қағида өзгермейді: рульде отырған адам өз өмірі үшін ғана емес, айналасындағы ондаған адамның қауіпсіздігі үшін де жауап береді.