Түркістан облысы әкімінің орынбасары өңірдегі жасыл желектің жағдайымен танысты, деп хабарлайды Muztaumedia.kz.
Кезекті аралау барысында облыс әкімінің орынбасары тиісті басқармаға ескерту жасады. Облыс орталығының жаңа әуежай тас жолы бойындағы жасыл желек 240,0 гектарға жайғастырылып бапталуда. Мұнда 730 мың ағаш көшеттері отырғызылған. Жасыл аймақта мониторинг тұрақты әрі мұқият жүргізілуі қажет. Толықтай тамшылатып суару жүйесі орнатылған.
Ағаштардың жерсіну пайызын арттыру мақсатында жасыл желекті аймақта қазіргі таңда суғару нормасын күшейту үшін қосымша ұңғыма қазылуда. Сондай-ақ, электр желісін тарту, тамшылатып суару жүйесін жаңарту және оларды автоматтандыру ісі қолға алынған.
Облыс әкімінің орынбасары Нұрбол Тұрашбеков атқарылған жұмыстарды аралап, тапсырмалардың орындалуын тексерді. Суғару кестесін түзуде ауа райы мен топырақ ерекшеліктеріне назар аудару қажеттігін ескертіп, тыңайтқыш таңдау мәселесіне де тоқталды. Айтылған кемшіліктерді қалпына келтіру мерзімін белгілеп, жауаптыларды бекітті.
— Орман екпесін күтіп баптау жұмыстары тұрақты жүргізілуде. Аталған учаскеде жасыл желекті толықтыру бойынша күзде 80 мың дана жапырақты ағаш (қарағаш, жиде, тұт) көшеттерін отырғызу жоспарланып отыр, — делінген Түркістан облысы Табиғат Басқармасының баспасөз қызметі таратқан хабарламада.