Әл-Фараби атындағы Қазақ ұлттық университетінде тағы бір оқыс жағдай тіркелді. Студент қыз өзіне дене жарақатын салған. Оқиғаға байланысты полиция сотқа дейінгі тергеу бастады, деп хабарлайды Muztaumedia.kz.
Бұл ақпарат әлеуметтік желіде тарады. Алматы қалалық полиция департаментінің баспасөз қызметі оқиғаны растады.
«Алдын ала мәлімет бойынша, оқу орындарының бірінде студент қыздың өзіне жеңіл дене жарақатын салу фактісі тіркелді. Оған медициналық көмек көрсетілді», – деп хабарлады полиция.
Аталған дерек бойынша сотқа дейінгі тергеу басталған. Оқиғаның мән-жайы әзірге жарияланған жоқ. Ал заңгер Мейірман Шекеевтің айтуынша, қыз өзіне қол жұмсамақ болған.
Айта кетейік, қараша айының басынан бері ҚазҰУ-да екі студент қайтыс болған еді.
6 қарашада журналистика факультетінің бірінші курс студенті көз жұмды.
Ал 16 қарашада оқу орны география және табиғатты пайдалану факультетінің бірінші курс студентінің қайтыс болғанын растады. Полиция аталған дерек бойынша қылмыстық іс қозғап, күдіктіні ұстады.
Осы екі жағдайдан кейін Ғылым және жоғары білім министрлігі университетке кешенді тексеру жүргізетінін мәлімдеді.


