ІІМ Есірткі қылмысына қарсы іс-қимыл комитетінің бұрынғы төрағасы Данияр Мейірхан жыныстық қатынасқа мәжбүрлеу дерегі бойынша кінәлі деп танылды. Сот оған 6,4 миллион теңге көлемінде айыппұл салды. Қылмыстық іс жабық режимде қаралған, деп хабарлайды Muztaumedia.kz.
Сот қандай үкім шығарды?
19 қарашада Астана қаласының қылмыстық істер жөніндегі ауданаралық соты Данияр Мейірханға қатысты үкім жариялады.
«Ол ҚР Қылмыстық кодексінің 123-бабының 1-бөлігінде көзделген қылмысты жасағаны үшін кінәлі деп танылып, 1 500 АЕК мөлшерінде айыппұл төлеу жазасына кесілді. Іс жабық режимде қаралды. Үкім заңды күшіне енген жоқ», – деп хабарлады Астана соты Ulysmedia.kz редакциясына.
Аталған бап бойынша айыппұл, түзеу жұмыстары, бас бостандығын шектеу немесе үш жылға дейін бас бостандығынан айыру жазасы қарастырылған.
Оқиға қалай басталды?
Данияр Мейірханға қатысты дау 2026 жылдың сәуірінде әлеуметтік желілерде оның қарамағындағы қызметкерлердің шағымдары туралы ақпарат тарағаннан кейін өрбіді.
Жарияланым авторлары бұрынғы комитет басшысын қызметкер әйелге қысым көрсетіп, лауазымдық өкілетін асыра пайдаланды деп айыптаған. Сондай-ақ 20 бағынышты қызметкердің ұжымдық шағым түсіргені туралы ақпарат тарады.
Сол кезде Ішкі істер министрлігі арыз-шағымдардың түскенін растады. Тексеру кезеңінде Данияр Мейірхан қызметінен уақытша шеттетілді.
Кейін Ішкі істер министрінің орынбасары Санжар Әділов сталкинг дерегі бойынша қозғалған қылмыстық істің тоқтатылғанын мәлімдеді. Сонымен қатар ол жеке айыптау тәртібімен қаралатын материалдардың сотта жатқанын нақтылаған болатын.
Айта кетейік, сот үкімі әзірге заңды күшіне енген жоқ.


