Жетісуда жол бойындағы саудаға қатысты дау кезінде әйел адам соққыға жығылды, деп хабарлайды Muztaumedia.kz.
Жетісу облысы Ақсу ауданы Көлтабан ауылының тұрғыны редакцияға жол бойындағы саудаға қатысты мәселе туралы бейнежазба жолдады.
Тұрғынның айтуынша, Молалы айналма жолынан Балқаш көліне қарай шығатын жол бойында жергілікті кәсіпкерлерге, оның ішінде қарбыз бен қауын сатушыларға арналған арнайы сауда орны салынған. Алайда кейбір сатушылар белгіленген орынға бармай, жолдың бойында, айналма жолға кіреберіс маңында сауда жасайды.
Жергілікті тұрғындар бұл жағдай, біріншіден, көлік қозғалысы мен жаяу жүргіншілердің қауіпсіздігіне қатер төндіруі мүмкін екенін айтады. Екіншіден, арнайы сауда орнында отырған кәсіпкерлердің саудасына кері әсер етіп, олардың табысынан қағылуына себеп болып отырғанын жеткізген.
Тұрғындардың сөзінше, осы мәселеге байланысты бұған дейін де бірнеше рет полиция шақырылған. Алайда олардың айтуынша, жағдай өзгеріссіз қалған. Бүгін де мәселені шешу үшін полиция шақырылған. Алайда оқиға орнында жанжал шығып, бейнежазбада полиция қызметкерінің көзінше әйел адамның басқа бір әйелді теуіп жатқаны көрінеді. Зардап шеккен әйелдің ес-түссіз күйде жатқаны байқалады.
Алдын ала мәлімет бойынша, соққыға жығылған әйел Ақсу аудандық орталық ауруханасына жеткізіліп, оған қажетті медициналық көмек көрсетіліп жатыр.
Тұрғындар құқық қорғау органдарынан оқиғаны жан-жақты тексеріп, жәбірленушінің құқықтарын қорғауды және кінәлілер анықталған жағдайда заң аясында тиісті шара қолдануды сұрайды.
Аталған жағдайқа қатысты полиция қылмыстық іс қозғады.
https://www.instagram.com/reel/Db2nStVKZJr/?igsh=NDlvdTk2MDM1dHA5