Қытайдың Цинхай провинциясында өткен 27-ші Цинхай жасыл даму сауда-инвестициялық жәрмеңкесі өңірдің экологиялық, экономикалық және технологиялық әлеуетін әлемге танытқан маңызды халықаралық алаңға айналды.
Биыл 27-рет ұйымдастырылған жәрмеңке 15–19 шілде аралығында Синин қаласында өтті. Іс-шараны Цинхай провинциясының халық үкіметі ұйымдастырды. Бүгінде бұл жәрмеңке халықаралық ынтымақтастықты кеңейтуге, сыртқы ашықтықты арттыруға және өңірдің сауда-экономикалық байланыстарын нығайтуға бағытталған маңызды платформа саналады.
Жәрмеңкенің ашылу рәсіміне Қытайдың мемлекеттік басшылығы, министрліктер мен ведомстволардың жетекшілері, шет мемлекеттердің жоғары лауазымды өкілдері, дипломатиялық корпус мүшелері, халықаралық ұйымдардың басшылары, ғылым және бизнес қауымдастығының өкілдері қатысты.
60 мың шаршы метрлік көрме
Биылғы көрме шамамен 60 мың шаршы метр аумақты қамтыды. Оның ішінде 38 тақырыптық экспозициялық аймақ ұйымдастырылып, жалпы көрме павильондарының көлемі 15 мың шаршы метрге жетті.
Экспозициялар экологиялық өркениетті дамытудың жоғары стандарттарын қалыптастыруға және өңірдің стратегиялық салаларын таныстыруға арналды. Көрмеде үш негізгі павильон жұмыс істеді:
- Жасыл даму павильоны;
* Ынтымақтастық және алмасу павильоны;
* Өңірлік даму павильоны.
Көрме барысында Цинхайдың экологиялық артықшылықтары, жасыл әрі төмен көміртекті экономиканы дамытудағы жетістіктері, сондай-ақ Қытайдың түрлі провинциялары мен халықаралық серіктестердің әлеуметтік-экономикалық жобалары ұсынылды.
Қазақстан алғаш рет ұлттық павильон ұсынды
Биылғы жәрмеңкенің тағы бір ерекшелігі – Қазақстанның алғаш рет ұлттық павильонмен қатысуы болды.
Ал құрметті қонақ ел мәртебесіне ие болған Чили жоғары деңгейдегі делегациясын бастап келіп, ұлттық көрмесін ұйымдастырып, ынтымақтастық пен тәжірибе алмасуға арналған бірқатар арнайы іс-шара өткізді.
Бұл халықаралық форматтың жаңа деңгейге көтерілгенін және Цинхай жәрмеңкесінің Қытайдың батыс өңірін әлеммен байланыстыратын маңызды көпірге айналып келе жатқанын көрсетті.
Жасыл даму – Цинхайдың басты бағыты
Цинхай провинциясы соңғы жылдары экономикалық өсім мен табиғатты қорғауды қатар дамытуға басымдық беріп келеді.
Бұл туралы Цинхай провинциясы партия комитетінің хатшысы әрі провинциялық халық өкілдері жиналысы Тұрақты комитетінің төрағасы У Сяоцзюнь (Wu Xiaojun) мәлімдеді.
«Біз жасыл даму тұжырымдамасын басшылыққа ала отырып, өңірді жасыл экономика үшін тартымды бағыт ретінде дамытуға күш саламыз. Жасыл туризмді негізгі салалардың біріне айналдырып, сапалы өнімдер мен қызметтердің ұсынысын кеңейтеміз. “Керемет Цинхай”, “Үш өзеннің бастауы”, “Барлық таулардың өлкесі” секілді өңірдің танымал брендтерін ілгерілету арқылы жоғары сапалы өнімдерді таныстырып, Цинхайды халықаралық экотуризмнің таңдаулы бағытына айналдыруды мақсат етеміз.
Біз жасыл әрі органикалық даму бағытын берік ұстанамыз. Цинхайдың ауыл шаруашылығы мен органикалық өнімдерінің әлеуетін арттырып, өндіріс көлемін тұрақты түрде ұлғайтамыз және Қытайдың ішкі нарығында жобаларымызды белсенді түрде кеңейтеміз. Жасыл әрі органикалық өнімдер мен қызметтердің жоғары сапалы дамуы осы бағыттағы жаңа мүмкіндіктерге жол ашады.
27-ші Цинхай жасыл даму инвестициялық және сауда жәрмеңкесі бүгінде саясатты ілгерілететін маңызды алаңға, өңірдің келбетін танытатын көрмеге, ашықтық саясатын көрсететін терезеге және экономикалық өсудің қуатты қозғаушы күшіне айналды.
Бұл жетістік партияның дұрыс басшылығының, мемлекеттік органдардың үйлесімді жұмысының және бизнес қауымдастығының қолдауының нәтижесі. Биылғы жасыл даму бағытындағы жетістіктер – осы бірлескен еңбектің айқын көрінісі», – деді У Сяоцзюнь.
Экологиядағы нақты нәтиже
Цинхай табиғатты қорғау бағытында да айтарлықтай нәтижелерге қол жеткізген.
Өңірде шөлейттенген жерлердің көлемі жыл сайын азайып келеді. Сонымен қатар Цинхай бес жыл қатарынан ұлттық мониторинг жүргізілетін барлық су нысандарында судың сапасы 100 пайыз “өте жақсы” деңгейде сақталған Қытайдағы жалғыз провинция атанды.
Соңғы жылдары Тибет киігінің, Цинхай көліндегі жалаңаш тұқы балығының және қар барысының саны айтарлықтай көбейген. Бұл өңірдегі биоалуантүрлілікті сақтауға бағытталған мемлекеттік саясаттың тиімділігін көрсетеді.
Цинхай табиғи тұзды көлдерге аса бай аймақ саналады.
Провинция калий мен магний тұздарының қоры бойынша Қытайда бірінші орында тұр. Ал литий мен натрий тұздарының қоры жөнінен екінші орында келеді.
Өңірде әлемдегі ең ірі калий тыңайтқыштарын өндіру базасы жұмыс істейді. Сонымен қатар Қытайдағы жылына 10 мың тонна жоғары тазалықтағы магний оксидін шығаратын ең ірі өндіріс іске қосылған.
Қазіргі уақытта Цинхайда:
* Қытайдағы калий тыңайтқышының 77 пайызы;
* литий карбонаты өндірісінің 23,5 пайызы өндіріледі.
Бұл жаңа энергетика саласын дамытуға және елдің азық-түлік қауіпсіздігін қамтамасыз етуге елеулі үлес қосып отыр.
Таза энергетика орталығы қалыптасып келеді
Цинхай жаңартылатын энергия көздерін дамыту бойынша да Қытайдың жетекші өңірлерінің біріне айналған.
Мұнда су энергетикасы, күн және жел энергетикасы қатар дамып келеді. Соңғы жылдары өңірдегі жаңа энергетика нысандарының белгіленген қуаты бірнеше есе артқан.
Бұл туралы У Сяоцзюнь өз сөзінде ерекше атап өтті.
«Шөлейттенген жерлердің аумағы жылдан жылға азайып келеді. Цинхай – бес жыл қатарынан ұлттық мониторинг жүргізілетін барлық су нүктелерінде судың сапасы 100 пайыз “өте жақсы” деңгейде сақталған Қытайдағы бірден-бір провинция. Биологиялық алуантүрлілік те қарқынды дамып келеді. Тибет киігінің, Цинхай көлінің жалаңаш тұқы балығының және қар барысының саны айтарлықтай артты. Бүгінде барлық тіршілік иелері табиғатпен үйлесімде өмір сүріп жатыр. Қытайдың “су мұнарасы” саналатын Цинхай бұрынғыдан да тұрақты әрі бай экожүйеге ие болды.
Біз әлемдік деңгейдегі тұзды көл өнеркәсібі базасын қалыптастыруда жаңа жетістіктерге қол жеткіздік. Цинхай табиғи тұзды көл ресурстарына аса бай өңір. Калий мен магний тұздарының қоры бойынша елде бірінші орында, ал литий мен натрий тұздарының қоры бойынша екінші орында тұр. Елдің азық-түлік және энергетикалық қауіпсіздігін қамтамасыз ету мақсатында тұзды көл ресурстарын кешенді пайдалануды күшейттік.
Бүгінде әлемдегі ең ірі калий тыңайтқышын өндіру базасын және Қытайдағы жылына 10 мың тонна өнім шығаратын ең ірі жоғары тазалықтағы магний оксиді жобасын іске қостық. Сонымен қатар сода өндірісінің қуаты елдегі ең жоғары көрсеткіштердің қатарына кіреді. Халықаралық деңгейдегі бірқатар технологиялық жетістіктердің арқасында калий, натрий, магний, литий және хлор бағыттары бойынша бес ірі өнеркәсіптік кластер қалыптастырылды.
Қазір Қытайдағы калий тыңайтқышының 77 пайызы және литий карбонаты өндірісінің 23,5 пайызы Цинхайда өндіріледі. Бұл елдің азық-түлік қауіпсіздігін қамтамасыз етуге және жаңа энергетикалық материалдар өндірісін дамытуға елеулі үлес қосып отыр.
Ұлттық деңгейдегі таза энергия индустриясының жаңа орталығы қалыптасып келеді. Су ресурстары мен жаңартылатын энергия көздерінің мол қоры, сондай-ақ өңірдің энергетикалық әлеуеті Қытайдың жасыл энергетика саласының дамуына зор серпін берді.
Бүгінде Цинхайдың жаңа энергетика саласындағы белгіленген қуаты бұрынғыдан үш есе артты. Бұл Қытайдың жасыл энергетиканы дамыту жолындағы маңызды әрі дұрыс қадамы болып табылады», – деді У Сяоцзюнь.
Цинхай бүгінде табиғатты қорғау, таза энергия, органикалық ауыл шаруашылығы және халықаралық инвестициялық ынтымақтастықты бір арнаға тоғыстырған өңір ретінде қалыптасып келеді. Сондықтан 27-ші жасыл даму сауда-инвестициялық жәрмеңкесі Қытайдың экологиялық даму моделін көрсететін ғана емес, халықаралық әріптестікке жаңа мүмкіндіктер ашатын маңызды алаңға айналды.