Таразда 29 жастағы Думан есімді азамат ауыр соққыдан кейін ауруханада көз жұмды. Марқұмның туыстары оның өліміне қатысты мән-жайларды айтып, іске қатысы бар адамдардың барлығы жауапқа тартылуын талап етіп отыр, деп хабарлайды Muztaumedia.kz.
Дереккөз мәліметінше, Думан ауруханада жұмыс істеген. Бір күні оның емделушілерінің бірінің бұрынғы күйеуі оған бірнеше рет қоңырау шалып, балағаттаған әрі кездесуге шақырған.
Марқұмның туыстарының айтуынша, кездесуге үш адам келген. Олар Думанды басынан ұрып, көліктің жүксалғышына күштеп салып, кейін Аса өзенінің маңына апарған. Сол жерде оны қатты соққыға жыққан деген болжам бар.
Ес-түссіз жатқан Думанды кейін өзінің көлігіне салып, ауруханаға жеткізген. Туыстарының сөзінше, күдіктілер медицина қызметкерлеріне оны көшеден тауып алғандарын айтқан. Алайда Думан есін жимастан қайтыс болды.
Марқұмның әпкесі полиция бастапқыда үш адамды ұстағанын, кейін олардың екеуі босатылғанын мәлімдеді. Сондай-ақ оның айтуынша, негізгі күдікті Думанның емделушісі болған әйелге бұған дейін де бірнеше рет қол көтерген.
Туыстары Думан мен әйелдің арасында жұмыстан тыс ешқандай қарым-қатынас болмағанын алға тартып отыр. Олардың сөзінше, телефондағы хат алмасулар да мұны растайды.
Думан екі күннен кейін 30 жасқа толуы керек еді. Оның артында екі кішкентай қызы қалды. Отбасы оқиғаға қатысы бар барлық адамның анықталып, заң алдында жауап беруін талап етуде.