2002 жылы туған алғашқы альпинист әйел Алматы облысының Қарасай ауданындағы Октябрёнок шыңына көтерілу кезінде аяғын сындырып алған. Ал 1992 жылы туған екінші альпинист әйел Талғар ауданындағы Маяковский шыңына көтерілу барысында жарақат алды, деп хабарлайды Muztaumedia.kz.
Құтқару операциясын жүргізу үшін оқиға орнына ТЖМ «Барыс» республикалық жедел-құтқару жасағының құтқарушылары, Алматы қаласы ТЖД Құтқару қызметінің құтқарушылары және Апаттар медицинасы орталығының дәрігерлері Ми-8 тікұшағымен жедел аттанды.
Алдымен тікұшақ теңіз деңгейінен 4208 метр биіктікте орналасқан Маяковский шыңынан 34 жастағы альпинист әйелді эвакуациялады. Кейін әуе кемесі теңіз деңгейінен 3480 метр биіктіктегі Октябрёнок шыңына бағыт алып, аяғы сынған 24 жастағы қызды эвакуациялады. Құтқару операциясы аяқталған соң тікұшақ Алматы қаласындағы №4 қалалық клиникалық аурухананың тікұшақ алаңына қонды. Зардап шеккендер қажетті медициналық көмек көрсету үшін дәрігерлерге тапсырылды.
Жұмыстар аса күрделі биік таулы жағдайда жүргізілді. Тікұшақ экипажы жіті есеп жүргізіп, тік жартасты беткейлер арасындағы шектеулі алаңдарға сәтті қонып, зардап шеккендерді қауіпсіз эвакуациялауды қамтамасыз етті.
ТЖМ ескертеді: биік таулы жерлерге шығу мұқият дайындықты, ауа райы жағдайын алдын ала бағалауды, сертификатталған жабдықтарды пайдалануды және қауіпсіздік талаптарын қатаң сақтауды талап етеді.