Украина президентінің айтуынша, майдан шебіндегі қақтығысты тоқтатып, қазіргі шеп бойынша соғысты уақытша тоқтату — Киев келісуге дайын ең төменгі талап, деп хабарлайды Muztaumedia.kz .
Украина президенті Владимир Зеленский Fox News телеарнасына берген сұхбатында Ресей мен Украина арасындағы әскери қақтығысты бейбіт жолмен реттеудің алғашқы қадамы ретінде майдан шебін тұрақтандыруды қолдайтынын айтты.
Одан Украина аумағының 75%-ын немесе одан да көп бөлігін сақтап қалу шартымен бітімге келуге дайын ба деп сұралған. Зеленский бұл ұсынысты қолдайтынын жеткізді.
«Иә, дәл қазір бізге майдан шебіндегі қақтығысты тоқтату қажет. Менің ойымша, бұл — соғысты аяқтаудың нақты мүмкіндігі. Біз мұны атысты тоқтату деп атаймыз. Майдан шебін қатырып, соғысты тоқтату. Әрине, дәл қазір бұл — Ресейден талап ететін ең төменгі шарт», — деді ол.