Шымкентте Каспийдегі қайғылы оқиғаға қатысты тікелей эфир кезінде балағат сөз айтқан 21 жастағы ер адам әкімшілік жауапкершілікке тартылды. Оған қоғамға құрметсіздік танытты деген айып тағылған, деп хабарлайды Muztaumedia.kz.
Полиция әлеуметтік желілерге мониторинг жүргізу барысында TikTok платформасындағы тікелей эфирді анықтаған. Эфир кезінде Шымкент тұрғыны Нұрахмет Бердібай көрерменнің қаралы жағдайға қатысты сұрағына жауап берген.
Тікелей эфир барысында ол: «Каспийдегі сарбаздар біз үшін өліп пе», – деген сөз айтқан.
Полицияның мәліметінше, оның бұл әрекеті қоғамға анық құрметсіздік танытып, қоғамдық тәртіпті бұзатын сөздер айту ретінде бағаланған.
Сонымен қатар эфирге 22 жастағы Абзал Мұсырманқұл мен Бақдәулет Мұстафа да қатысқан.
Сот шешімімен Нұрахмет Бердібай 10 тәулікке әкімшілік қамауға алынды.
Бұдан бөлек, полиция үш азаматқа да қоғамға жат мінез-құлыққа жол бермеу туралы ресми ескерту жасаған.
«Олар ішкі істер органдарында бір ай мерзімге профилактикалық есепке қойылды», – делінген полиция хабарламасында.
Айта кетейік, бұған дейін желіде Каспий теңізіндегі оқу-жаттығу кезінде қаза тапқан 14 әскери қызметшінің өліміне қатысты ер адамның даулы пікір айтқаны туралы ақпарат тараған болатын.