Қазақстандық режиссер Нұртас Адамбайдың жұбайы Ғалия күйеуінің бірнеше жылдан бері коуч Торебек Бекбаевтың ықпалында жүргенін мәлімдеді. Оның айтуынша, күйеуінің ұстанымдары балаларға кері әсер етіп, отбасында жиі жанжал туындайды, деп хабарлайды Muztaumedia.kz.
Әйелдің сөзінше, Адамбай балаларға дәрігер тағайындаған дәрілерді беруге, дұрыс тамақтануға, тіпті тіс тазалауға да қарсы.
«Үш жасар баланың тісін тазалату үшін күн сайын таңертең күресуге тура келетін үйде өмір сүру – нағыз азап. Себебі әкесі қызының өз еркіне қарсы қандай да бір әрекет жасауына қарсы. Бұл – Нұртас Төребекшілер сектасынан алып келген сандырақтың, тас дәуірі мен Ауғанстандағы жағдайға ұқсас көзқарастың жүзден бір бөлігі ғана», – деді Ғалия.
Сондай-ақ ол аталған «сектаның» ықпалына мыңдаған адам түскенін мәлімдеді. Атап айтқанда, қызы жыныстық зорлық-зомбылыққа ұшыраған бір әйелдің оқиғасын баяндады. Ғалияның айтуынша, Бекбаев болған жағдайға қыздың анасын кінәлап, соның салдарынан әйел өзіне қол жұмсау туралы ойлаған.



