Талдықорғанда ер адам бір жасар баласының жылағанына ашуланып, әйелін ұрып-соққан, деп хабарлайды Muztaumedia.kz.
Оқиға 2 қазанға қараған түні болған. Жәбірленушінің туыстарының сөзінше, ер адам әйелін таңғы сағат 4-ке дейін ұрып, көмекке келген көршілерге пневматикалық қарумен қоқан-лоқы көрсеткен. Сондай-ақ оның бұған дейін де әйеліне бірнеше рет күш көрсеткені айтылды.
Әйел полицияға арызданған. Оның айтуынша, күйеуі дене жарақатын салып, қорқытқан. Полиция күдіктіні ұстады. Одан пневматикалық қару тәркіленді.
Аталған фактілер бойынша дене жарақатын келтіру және қорқыту баптарымен қылмыстық істер қозғалды. Күдікті уақытша ұстау изоляторына қамалды.
Ал жәбірленуші баласымен бірге дағдарыс орталығына орналастырылды.
Полицияның мәліметінше, бұған дейін әйел күйеуіне қатысты құқық қорғау органдарына шағым түсірмеген.