«CBS News» (https://www.cbsnews.com/) дерегінше, тақ мұрагері Мұхаммед бен Салман жағдайды АҚШ президенті Дональд Трамппен бірнеше рет талқылаған. Эр-Рияд Вашингтоннан Йемендегі хуситтердің нысандарына соққы беруді сұраған. Алайда Трамп тікелей әскери операцияға әзірге келіспей, барлау мәліметтерімен көмектесуді ұсынған.
Сауд Арабиясының алаңдаушылығына Баб-эль-Мандеб бұғазындағы жағдай себеп болып отыр. Еуропа мен Азия арасындағы теңіз саудасының маңызды бөлігі осы бағыт арқылы өтеді. Бұғаз жабылса, кемелер Африканы айналып, Үміт мүйісі арқылы жүруге мәжбүр болады.
Хуситтердің шабуылы Сауд Арабиясының мұнай инфрақұрылымы мен теңіз жолдарына да қысымды күшейтті. «Reuters» мәліметінше, шабуылдардан кейін корольдіктің нарыққа жеткізетін мұнай көлемі соңғы отыз жылдан астам уақыттағы ең төмен деңгейге түскен. Қызыл теңіздегі тұрақсыздық енді аймақтық жанжалдың шеңберінен шығып, әлемдік энергетикаға әсер ете бастады.
Эр-Рияд үшін мәселе сауда мен мұнай тасымалына ғана тірелмейді. Сауд билігі хуситтерге қарсы ауқымды операция Иранмен жаңа әскери текетіреске жол ашуы мүмкін деп қауіптенеді. Сондықтан корольдік әскери жауап пен өңірлік соғыстың арасына барынша сақ қадам жасап отыр.
Хуситтермен байланысты Al Masirah телеарнасы Сауд Арабиясы алғашқы әуе соққыларын жасады деп мәлімдеді. Алайда Эр-Рияд мұндай операция жүргізгенін ресми түрде растаған жоқ. Сол себепті әуе соққысы туралы ақпарат әзірге тараптардың бірінің мәлімдемесі ретінде ғана қарастырылады.
Қызыл теңіздегі түйін осылайша Вашингтон, Эр-Рияд және Тегеран мүдделері түйіскен жаңа қысым нүктесіне айналды. АҚШ-тың барлау қолдауымен шектелуі Трамп әкімшілігінің соғыс ауқымын кеңейтуге асықпай отырғанын аңғартады. Ал бұғаздағы жағдай күрделене берсе, әскери араласудан бас тарту Вашингтон үшін барған сайын қиындай түсуі мүмкін.