Қазақстан Ұлттық Олимпиадалық комитетінің президенті Геннадий Головкин АҚШ-тың Қазақстандағы елшісі Джули М. Стаффтпен кездесті, деп хабарлайды Muztaumedia.kz.
Кездесуге Қазақстан ҰОК Бас хатшысы Әлімжан Ақаев пен АҚШ Миссиясы басшысының орынбасары Дебора Робинсон қатысты. Тараптар екі ел арасындағы спорт және дене шынықтыру саласындағы ынтымақтастықты одан әрі дамыту мәселелерін талқылады.
Кездесуде 2028 жылы Лос-Анджелесте өтетін Олимпиада ойындарына дайындыққа ерекше назар аударылды. Атап айтқанда, Қазақстан спортшылары мен делегация мүшелеріне виза рәсімдеу, сондай-ақ Олимпиада кезінде Лос-Анджелесте «Қазақстан үйін» ашу мәселелері сөз болды. АҚШ Елшілігі бұл бағыттарда қажетті қолдау көрсетуге дайын екенін жеткізді.
Тараптар қазақстандық боксшылардың АҚШ-тағы оқу-жаттығу жиындарының нәтижесін де оң бағалады. Сонымен қатар екі ел спортшыларының қатысуымен Қазақстан мен АҚШ-та бірлескен оқу-жаттығу жиындары мен спаррингтер өткізуге қызығушылық білдірілді.
Қазақстан тарапы алдағы халықаралық спорттық жарыстар, соның ішінде әлем чемпионаттары мен Алматыда өтетін қысқы Азия ойындары туралы ақпарат ұсынды.
Кездесу соңында тараптар спорт дипломатиясы екі ел арасындағы байланысты нығайтуға ықпал ететін маңызды бағыттардың бірі екенін атап өтті.