Актер әрі блогер Нұрсұлтан Жақсыген өзіне қатысты сот үкімі шыққан күні әлеуметтік желіде оқырмандарына үндеу жасады, деп хабарлайды Muztaumedia.kz.
Ол өзін қолдап, дұға тілеп жатқан жандарға алғыс білдіріп, қазіргі жағдайдың уақытша екенін айтты.
«Бәрі уақытша, балапандарым. Алла қаласа, күшті болып ораламын! Жақсы көремін сендерді. Бұл да өткінші нәрсе, дұғаларыңызға ризамын. Иншалла, бәрі жақсы болады. Алла осылай қаласа, бір қайыр бар», – деп жазды Нұрсұлтан Жақсыген.
Еске салайық, 16 қыркүйекте Алматы облысы Қарасай аудандық соты Жақсыгенді Қылмыстық кодекстің 274-бабы 2-бөлігінің 3-тармағы бойынша кінәлі деп таныды. Ол масс-медиа, телекоммуникация желілері және онлайн-платформалар арқылы көрінеу жалған ақпарат таратты деп айыпталған.
Сот актерді 2 жыл 3 айға бас бостандығынан айырды. Сонымен қатар 5 жыл бойы журналистік, блогерлік және көпшілікке ақпарат таратуға байланысты қызметпен айналысуына тыйым салды. Жәбірленушіге 5 миллион теңге моральдық өтемақы төлеуге міндеттеді.
Алайда үкім әзірге заңды күшіне енген жоқ. Жақсыгеннің адвокаты Тілеужан Кішкенебаев апелляциялық шағым түсіретінін мәлімдеді. Қорғау тарапы әлеуметтік желідегі даулы парақшалардың актерге тиесілі екенін анықтау үшін қосымша сараптама жүргізуді сұраған, алайда сот бұл өтінішті қанағаттандырмаған.