Биыл жазда Шымкент – Алматы бағытындағы FlyArystan рейсінде болған жағдай енді сотта қаралмақ, деп хабарлайды Muztaumedia.kz ақпарат порталы.
Жолаушы Абылай Байтеновтің айтуынша, 9 шілдеде адамдарды ұшаққа отырғызғаннан кейін есіктер жабылып, кондиционер жұмыс істемеген салонда шамамен 45 минут ұстаған.
Сол күні Шымкентте ауа температурасы +36,2 градус болған, ал жолаушылардың бірінің жағдайы нашарлап, оған көмек көрсетуге тура келген.
Кейін жолаушылар қайтадан терминалға шығарылып, рейсті тағы бір сағаттай күткен.
Байтенов енді сол күнгі температура туралы ресми деректер мен видеожазбаларды сотқа дәлел ретінде ұсынбақ, ал FlyArystan-ға қарсы талап бойынша сот отырысы 20 қазанға белгіленген.
Жолаушылардың қауіпсіздігіне жауапты әуе компаниясында адамдардың аптап ыстықта жабық ұшақ ішінде осынша уақыт отыруына неге жол берілгені енді сотта анықталмақ.