Осылайша, тауарлар экспорты импорттан едәуір асып, елге түсетін валюталық кірістің маңызды көзіне айналып отыр.
Экспорттың жартысына жуығы мұнайға тиесілі
Саида Тілеуленованың айтуынша, Қазақстан экспортының құрылымында шикізат әлі де басым. Ұлттық статистика бюросының дерегіне сәйкес, 2026 жылдың алғашқы алты айында мұнай мен шикі мұнай өнімдері жалпы тауар экспортының 46,5 пайызын құраған. Сонымен қатар экспортта мыс, мыс кені, радиоактивті элементтер мен ферроқорытпалардың үлесі жоғары. 2025 жылы мұнайдың экспорттағы үлесі 50,5 пайыз болған.
«Қазіргі профицит экспорттық кірістің жоғары екенін көрсетеді. Алайда бұл экономика құрылымы түбегейлі өзгерді дегенді білдірмейді. Оның көлемі мұнай мен металл бағасына, өндіріс мөлшеріне және шикізатты сыртқы нарықтарға үздіксіз жеткізу мүмкіндігіне тәуелді болып отыр», – дейді сарапшы.
Оның сөзінше, әлемдік нарықта шикізат бағасы айтарлықтай төмендесе немесе экспорт көлемін шектейтін кедергілер туындаса, сауда балансының профициті де едәуір қысқаруы мүмкін.
Экспорттан түскен валютаның бәрі елде қалмайды
Қаржыгер сауда профицитінің жоғары болуы экспорттан түскен қаражаттың барлығы Қазақстан экономикасында қалады деген сөз емес екенін атап өтті.
Экспорттық кірістің бір бөлігі шетелдік қызметтер ақысын төлеуге, шетелдік инвесторларға инвестициялық табыс беруге, сыртқы міндеттемелерді өтеуге және өзге де төлемдерге жұмсалады.
«Сондықтан елдің сыртқы экономикалық жағдайының іргелі тұрақтылығын бағалау кезінде сауда балансымен ғана шектелмей, төлем балансының жалпы көрсеткіштеріне де назар аудару қажет», – деді Саида Тілеуленова.
Шикізаттық емес экспорт өсіп келеді
Сонымен бірге Қазақстан экспортының құрылымы біртіндеп өзгеріп жатқанын көрсететін оң үрдіс те бар. Сауда министрлігінің мәліметінше, 2026 жылдың алғашқы жартысында шикізаттық емес және өңделген тауарлар экспорты 12,9 млрд доллардан 15,2 млрд долларға дейін өскен.
Сарапшының пікірінше, бұл экспорттық базаның біртіндеп кеңейіп келе жатқанын білдіреді. Дегенмен қазіргі өсім сыртқы сектордың шикізат нарығындағы жағдайға тәуелділігін толық жоюға әзірге жеткіліксіз.
«Сауда балансының 14 млрд долларлық профициті – Қазақстан үшін маңызды қаржылық қор. Алайда оның тұрақтылығы шикізаттық емес экспорттың қаншалықты жылдам өсетініне, мұнай мен металл бағасына, өндіріс пен тасымал көлемінің сақталуына байланысты. Сондай-ақ экспорттан түскен табысты ел ішіндегі инвестицияға және еңбек өнімділігін арттыруға тиімді бағыттау маңызды», – деп қорытындылады сарапшы.
Дерекөз: dalanews.kz/